განვითარების მრავალსაუკუნოვანი ისტორიის მქონე კლასიკური მუსიკისგან განსხვავებით ჯაზი შედარებით „ახალგაზრდა“ მიმდინარეობაა. მიუხედავად ამისა, ქართულ ჯაზს უკვე მრავალი ათეული წლის ისტორია აქვს – პირველი ჯაზ-ანსამბლი ჩვენს ქვეყანაში 30-იან წლებში ჩნდება, 60-იანი წლებიდან კი ჯაზს კინო-თეატრებსა და კლუბებშიც უკრავენ. დღეს ჯაზისადმი ინტერესი მეტად დიდია, რასაც ქართველი ჯაზ-მუსიკოსების მაღალი პროფესიონალიზმი მოწმობს.
ილიაუნი პირველი უმაღლესია ჩვენს ქვეყანაში, სადაც ჯაზი საბაკალავრო დონეზე ისწავლება. ჯაზ-ორკესტრის საკრავების მოდულში ორგანულადაა შერწყმული ჯაზის თეორია ეფექტურ პრაქტიკულ მეთოდთან, რომელიც აქცენტს საკუთარი, გააზრებული, შემოქმედებითი, იმპროვიზაციული სტილის ჩამოყალიბებაზე აკეთებს.
პროგრამით შეთავაზებულ საკრავებში შედის დასარტყამები, ელექტრო გიტარა, ბას-გიტარა, საქსაფონი, საყვირი, ფორტეპიანო, და ჯაზ-ორკესტრის სხვა საკრავები. ჩვენთან თქვენ:
- დაეუფლებით შესაბამის საკრავზე შესრულების ტექნიკას
- მიიღებთ ჯაზ-ჰარმონიის საბაზო ცოდნას
- შეისწავლით ჯაზის სტილების ისტორიას და შეძლებთ ამ ცოდნის პრაქტიკაში გადატანას
- გაეცნობით ჯაზურ მუსიკალურ ლიტერატურას
- შეისწავლით ჯაზ-იმპროვიზაციის საფუძვლებს და მის საშემსრულებლო თუ შემოქმედებით პრაქტიკაში გამოყენებას
- დაეუფლებით ჯაზ-ანსამბლში დაკვრის ტექნიკას და გამომსახველობის ხერხებს
- მიიღებთ სათანადო რეპერტუარის შერჩევისა და შექმნის საბაზო ცოდნას
- მიიღებთ სასცენო-საკონცერტო გამოცდილებას.
