მუსიკის ძირითადი და დამატებითი საბაკალავრო პროგრამები რამდენიმე მიმართულებაზე სწავლას გთავაზობთ. ესენია:
- სავალდებულო კურსები – აქ მიიღებთ მუსიკოსისთვის აუცილებელ, საბაზისო ცოდნას მუსიკის ისტორიის და თეორიის შესახებ; დაეუფლებით საკლავიშო უნარებს.
- ელექტროაკუსტიკური და კომპიუტერული მუსიკა – სადაც შეისწავლით ამ მიმართულების ისტორიასა და ესთეტიკას, უმნიშვნელოვანეს წარმომადგენლებსა და ნიმუშებს; ელექტროაკუსტიკური კომპოზიციის მნიშვნელოვან პრინციპებს და საშუალებებს; სპეციალურ კომპიუტერულ პროგრამებს Audobe Audition, MAX-MSP-Jitter, Pro Tools; ბგერის ჩაწერას, შენახვასა და მანიპულაციას; მუსიკის პროგრამირების და „ლაივ“ ელექტრონიკის საფუძვლებს; აუდიო ედიტორ პროგრამებში დამოუკიდებელი მუშაობის და ინტერაქტიური ხმის დიზაინის ბაზისებს კომპიუტერულ თამაშებში, ინსტალაციებში და თანამედროვე კომპიუტერულ და მობილურ აპლიკაციებში.
- ჯაზი და პოპ-მუსიკა – რომელიც მოიცავს ჯაზ-ვოკალის, ჯაზ-ორკესტრის საკრავების (ელექტრო გიტარა, ბას-გიტარა, დასარტყამები და ჯაზ-ფორტეპიანო) და პოპ-ვოკალის მოდულებს. აქ თქვენ შეისწავლით ჯაზის და პოპ-მუსიკის ისტორიას; ჯაზის ჰარმონიასა და სოლფეჯიოს; ჯაზის სხვადასხვა მიმდინარეობის საშემსრულებლო პრინციპებსა და ტექნიკებს, ჯაზის შემსრულებლისათვის აუცილებელ რეპერტუარს (ჯაზსტანდარტებს) და ჯაზური კომპოზიციების აგების, პრაქტიკული ჯაზური იმპროვიზაციის საფუძვლებს; სოლო და ანსამბლში მუზიცირებას, გოსპელ-გუნდში სიმღერას და სასცენო მოძრაობას.
- ქართული ტრადიციული მუსიკა – რომელიც გთავაზობთ ქართული ხალხური, ქალაქური და საეკლესიო მუსიკის, ასევე მსოფლიოს ხალხთა ეთნიკური მუსიკალური კულტურის შესწავლას. აქ თქვენ იმღერებთ ქართულ და მსოფლიოს სხვა ხალხების ტრადიციულ სიმღერებს; გაეცნობით საქართველოში გავრცელებულ ხალხურ საკრავებს და დაეუფლებით ტრადიციულ სიმებიან საკრავებზე დაკვრის საფუძვლებს; მიიღებთ ცოდნას ეთნომუსიკოლოგიის ისტორიისა და კვლევის მეთოდების, ასევე, ქართული ტრადიციული სიმღერის, საეკლესიო გალობისა და საკრავიერი მუსიკის ცნობილი ოსტატების ცხოვრებისა და მოღვაწეობის შესახებ.
- კომპოზიცია და არანჟირება – რომელშიც გაეცნობით მუსიკალური კომპოზიციის ძირითად პრინციპებსა და მეთოდებს; შეისწავლით თანამედროვე პროფესიული (მათ შორის ქართული) მუსიკის უმნიშვნელოვანეს მიმდინარეობებს, ტექნიკებსა და წარმომადგენლებს; შექმნით საკუთარ სოლო და საანსამბლო მუსიკალურ კომპოზიციებს; გააორკესტრებთ სხვადასხვა ეპოქისა და ხასიათის მუსიკას; დაეუფლებით სხვადასხვა ხმოვან და სანოტო-სარედაქტორო კომპიუტერული პროგრამასა და მუსიკალური მასალის კონვერტაციის ტიპებს.
- ფორტეპიანო და ბაროკოს კლავიშიანები – სადაც მიიღებთ ცოდნას კლასიკური და ბაროკოს ეპოქის მუსიკის მახასიათებლების, სტილების, ჟანრებისა და ფორმების შესახებ; გაეცნობით ამ ეპოქების საკლავიშო ხელოვნების ისტორიასა და მათთვის დამახასიათებელ საშემსრულებლო ხერხებს; შეისწავლით ევროპული, კერძოდ, ბაროკოს და რენესანსის მუსიკის ისტორიას; მიიღებთ სოლო და ანსამბლში მუზიცირებისთვის, მუსიკალური ნაწარმოების ინტერპრეტაციისთვისა და მუსიკის საჯარო შესრულებისთვის აუცილებელ უნარ-ჩვევებს.
მუსიკის საბაკალავრო პროგრამებისა და კურსების ნახვა შეგიძლიათ აქ